D’n Opstaeker 2024, ein ôntwerp van Ivo Nellissen
Met de 11de van de 11de in ’t veuroétzich, is ’t auk weer haos tiéd veur de nieje Opstaeker. De iér is dit jaor aan Venlonaer Ivo Nellissen gegund. Ivo is beej zien ôntwerp van D’n Opstaeker 2024 truuk gegaon nao de basis van de vastelaovend door gewoën “Op die kis te houwe”.
Vergöld waas Ivo wie hae, names de stadsdeilvereiniginge, door de veuzitter van Venloosch Vastelaovesgezelschap Jocus gevraog woort um D’n Opstaeker veur vastelaovend 2024 te ôntwerpe. Direk waas d’r auk ’t besef det hae heejbeej de meugelikheid had, um zien eige persuuënlikke geveul van vastelaovend in zien ôntwerp te legge.
Ivo: “Die dreej daag, dao dreijt ’t um en dao môt ’t um dreije. Zôndaag is génne rösdaag um beej te kômme van de evenemente d’n daag daoveur. Op zôndaag begint ’t pas, det meug bes gezag waere. Spaar dich de puf en de pieke en zörg desse veural dreej daag vol de vastelaovend kins viere. ’T Geit um de schaele wazel, d’n optoch, de Boerebroélof, pierewaaije. De vastelaovend geit euver niks en tegeliék euver al waat eine Venlonaer leef is.
Heejoét is dan auk ’t ôntwerp ôntstaon, haos as statuut van de vastelaovend: Houwe op die kis (umdet ’t vastelaovend is). ’t Is eine alleszeggende regel oét ’t bekinde kouplet det idderein in Groët-Venlo en wiéd dao boéte zelfs nog kin.
“ ’t spraekwaordelikke wilde ik letterlik make, want juus auk dét is de vastelaovend”.
’T ontwerpproces verleep geleidelijk, waobeej ’t idee van de kis langzaamaan de juuste vorm kreeg en same met de voés en de meziék-noeëte ’t oétintelikke resultaat van D’n Opstaeker 2024 bereik.
Ivo Nellissen is getrouwd met Marlou en same hebbe ze 4 kinder. Ivo woort gebaore naeve ’t stadhoés baove de winkel en atelier van zien femilie, ein ech Venloos bedriéf det hae same met zien broor Pim in 2014 euvernoom van de generaties veur eur.
Goldsmeede en ontwerpe lierde Ivo in Zuud-Duitsland um aansloétend de Rietveldakademie in Amsterdam te doorlaupe.
Nao vanoét ’t weste van Nederland inkele jaore as zelfstandig ontwerper in binne- en boételand aktief te zien gewaes, kierde Ivo in 2004 truuk naor Venlo.
Zien leefde veur de vastelaovend zit in zien blood en bliéf hae euverdrage als gewaardeerd lid van de P&P kemmissie van Venloosch Vastelaovesgezelschap Jocus.
D’n Opstaeker 2024 wuurt op d’n Elfde van d’n Elfde geprissenteerd. Vanaaf dae datum is hae auk te kaup beej diverse winkels en via de online-kanale van de diverse vastelaovesvereiniginge.