Vandaag waas ’t den zoeëwied. Vur ‘t ieërs woort ich in ‘t prinselikke pak geheze! De sjmoking aan, prinseketting öm, laksjoon aan de veut, sjtaek op de kop en de scepter in de hank… Dao sjteisse den! Vur ‘t ieërs veulde ich mich ‘nne echte ‘Prins’!
Breid lachend en mèt ‘nne dieke glunder keek ich in de flitsende cameralens. Den besef se dich det ‘t toch allemaol sjnel doeënder beej kump!
Nao ‘n aantal kiekjes begós ich ‘t al behuuerlik werm te kriege. Det posere bliek toch intensiever te zien den ich dach! Gelökkig trok miene roeje köpke nao ‘n paar sjloeke beer wir weg. Maar good det ‘t sjtraks in de Hamar ‘n sjtök ‘keuler’ is!
Nów ‘t Vastelaovesseizoen officieel begós is, begint ouch langzaam ‘t dörp te sjpeculere euver ‘de nieje’. En det wuuert nao maote de waeke öm gaon, allein nag maar mieër! Ich probeer mich zoeëvuuel meugelik van de domme te haje en raoj vrolik mèt idderein mei. Toch gek en sjpannend öm z’n ‘undercover-rol’ te mótte sjpeule. Die rol mót ich nag efkes zeen vol te haje!
Ich wins uch allemaol veskes sjoeëne fieësdaag en ‘nne gójje roetsj!
Ich kèn neet wachte öm mich in 2025 aan uch veur te sjtelle!