Noow d’n elfde van d’n Elfde weer doënderbeej kump, is ’t auk haos weer tiéd veur de prissentatie van de nieje Opstaeker. Dit jaor is dees iër weggelag veur Joeri Holtman.
Joeri woort in 2004 as Belhamel gebaore. Daomei is hae de jongste ôntwerper van D’n Opstaeker. Ondanks ziene jônge laeftiéd haet hae al ein schat ervaring opgedaon. Tiédes zien schoëlperiode op ’t Blariacumcollege bewerkde hae al foto’s en filmpkes, waonao hae zich op ’t SintLucas college in Eindhove verder haet kinne doorôntwikkele op ’t gebied van vormgaeving.
Hae studeert intösse in Tilburg en volg dao ’t twiëde jaor van de hbo-studie Sportcommunicatie.
Daonaeve werk hae auk parttime beej de KNVB en is hae aktief as ‘freelancer’, waodoor hae al aan tôffe projekte haet meuge werke. Zoë is ’t wedstriédshirt van VVV-Venlo van dit jaor zien ôntwerp en haet hae auk de hoésttiél en ’t logo van ‘Belfeld 700 jaor’ vormgegaeve.
Joeri zien passie veur ’t kreatieve löp parallel aan zien plezeer veur vastelaovend. Det is um as kleine blaag door zien elders meigegaeve. Taegeswäördigs viert hae vastelaovend gaer mit zien vrinde van VK de Hanewurgers. Daomei trek hae idder jaor mei in de Belvendse- en Tegelse optoch. Joeri help binne deze groep gaer mei aan ’t bouwe van de wage.
Al zien ganse laeve steit veur Joeri ’t same viere van vastelaovend centraal. Joeri: “Veur vuuël minse begint de vastelaovend op d’n Elfde van d’n Elfde. Det geveul van same beejeinkômme en oétkiéke nao de kômmende maonde van plezeer en traditie heb ik verwerk in d’n Opstaeker”.
Veur ’t ôntwerp van D’n Opstaeker woel Joeri veural ein herkinbaar vastelaovesgeveul truuk te laote kômme. Idder jaor wuurt de vastelaovend mit alleman aafgetrap op Elf van Elf, waobeej ’t kenôn ein belangriéke rol speult. Um D’n Opstaeker ein extra feestelijk tintje te gaeve haet Joeri ein speulse prinsemuts op ’t kenôn geplaats. Op ’t raad haet hae subtiel d’n teks ‘Same viere weej de vastelaovend’ verwerk, verwiézend nao waat Joeri zelf erg belangriék vindt: ’t same kômme, same viere en geneete van de traditie.
D’n Opstaeker 2027 wuurt op d’n Elfde van d’n Elfde geprissenteerd. Vanaaf dae’n datum is hae auk te kaup veur € 6,50 beej verschillende winkels en via de online-kanale van de diverse vastelaovesvereiniginge.
