De Belhamels

Belaevenisse 4 januari

04-01-2023

As ich dit sjrief, is ‘t alwir 2023. ‘t Liek zoeë  lang geleje det ich bön gevraog öm prins te waere, maar sjtiekem is ‘t al bienao zoeëwied!

Ich tref de lètste veurbereidinge thoes en dink euveral nag èns eine kieër euver nao: wie zal ’t zien öm oet te kómme, wat zulle de minse zègge, wat gaon ich allemaol meimake? Jaorelang heb ich vanoet de zaal opgekeke nao de prins, maar nów bön ich ‘t zelf en gaon ich ‘t zelf meimake!

De raoj-foto’s heb ich intösse ouch al zeen hange. Sjpannend öm te zeen, maar ouch ein bevestiging: ‘t geit ech gebeure! Zelf raoj ich lekker mei mèt kammeräöj en femielie, want det deej ich altied al. Of ich al ‘nne kieër bön geraoje? Mesjien! In ‘t dörp huuer ich óngertösse via-via vraoge en conclusies euver mich nao aanleiding van ieërdere belaevenisse. Thoes lache weej dao same öm en dinke maar: de 22^e wet idderein wat d’r klopt van eur ideeë  en aannames.

Gaer zeen ich uch allemaol de 22e, want ‘t geit wir gebeure: weej meuge wir ein gans normaal seizoen gaon viere! Gèn coronavirus mieër, maar ’t vastelaovesvirus is wat ós in ziene greep geit haje de kómmende periode. Ich kiek d’r ontzettend nao oet, wies sjnel!

Allaaf!!

De nieje 2023

361 daag

13-11-2022

Zoeëlang is ‘t al geleje det vors John beej mich veur de deur sjting. Vandaag is eine beejzóngere daag: ein vergadering mèt ein nieje bezetting van de prinsekemissie! Wao veurhaer vors John en sirremoniemeister Sjoerd zich öm mich bekommerde, hebbe zeej in de tössetied letterlik en figuurlijk ‘t sjtekske euvergedrage aan Geert en Rob. Eff wenne veur idderein aan taofel, maar waal erg vuuel nieje energie en nag belangrieker: óntzettend vuuel zin öm kómmend jaor mèt uch ein fieésje te bouwe!

In ‘t veurjaor heb ich, same mèt uch, tóch nag ein bietje vastelaovend kènne viere. Wao vastelaoveszondig woort aangekleid mèt eine sjieke (op)toch, zien de jeug hoeëghede in mei oetgekómme. Geweldig öm te zeen wie zeej zich hebbe geammuseerd en wie ‘t dörp massaal oetleep veur dees toekóms van ózze vastelaovend. Super sjiek!

Ich wil de ganse tied al maar ‘t is nag neet zoeë wied’ (oet 't liedje '33 daag' van Bram Holla) is eine teks dae mich dök door de kop sjuut en dae ouch waal passend is: ‘t deurt lang, ech lang, veurdet ich mèt mien femielie en kammeräöj mien geheim kèn deile. Gelökkig heb ich in de tössetied eine goje vertrouwenspersoeën gevónge wao ich taegenaan kèn praote. Det sjaelt eie houp kèn ich uch zègge!

In de tössetied regel ich de dinge die nag gedaon mótte waere, maar stiekem is ‘t aaftelle waal begós. Aaftelle nao ein seizoen mèt uch allemaol same en gewoeën wir vastelaovend viere. Ich heb d'r zin in, geej ouch?

‘Want sjepe verwelke en roeëze vergaon, aevel vastelaovend blief altied besjtaon! (De klink van de kroeg, hoondervel)’.