De Belhamels

belaevenisse Jbb

17-01-2023

’t Is waas door de waeks vruueg op d’n aovend wie d’r opèns 3 vraemde persoeëne beej ós in de woeënkamer sjtónge.

Pap en mam ware ouch thoes, zeej deje  as ’t hieël normaal waas det dees persoeëne beej ós langskwame, aevel ich waas toch waal niesjierig! Dees 3 persoeëne sjtelde zich aan mich en mien elders veur en langsaam aan begós ’t beej mich te dage. Pap en mam sjtraolde maar toen ich ouch. Of ich bruudje 2023 wól waere? Yesss!!! Netuurlik wil ich det. Wauw! Neet verwach! Neet gedach! Wat óntzettend gaaf. En mèt wae waer ich den sJBB 2023? Wielang mót ich nag wachte vurdet ich weit mèt wae ich de vastelaovend 2023 ein mega fieësje meug gaon bouwe? Zól ’t den mèt dae of dae zien……OOOh dae haet zich ouch opgegaeve, of toch neet. Jeetje wat sjpannend!

Op eine angere doordewaeke daag iets later in de waek kwame opèns in ’t donker  3 vraemde minse ós hoeskamer binne. Zeej sjtelde zich veur, pap sjnapte d’r niks van wat d’r gebeurde. Pap en ich keke elkaar aan huh! Wat kump heej nów binne. Mam haet eine groeëte glimlach op eur snoet en ich dach dees minse van gezich te herkènne. Zeej sjtelle den ouch officieel de vraog as ich broedegom 2023 wil waere. En netuurlik zeg ich JAO!. Wie gaaf is det, Yes! Wauw! Sjiek! Ich heb de site nag noets zoeë in de gate gehaje, gènne witte rouk, zól ‘t den toch aan mich veurbeej gaon? Eindelik, zeej zien d’r! Óntzettend gaaf. Erg beniejd ouch nao mien bruudje, maar wie den ouch weej gaon d’r same zeker ein geweldig fieës van make. Op nao de Vastelaovend 2023. Inmiddels hebbe weej elkaar al in de ouge meuge kieke en YESSS dit is eine Top match! Weej gaon dit fieësje rocke! Weej zien d’r stiekum gans klaor veur!!!