De Belhamels

Raoj “De Nieje” 2020

28-12-2019

Ouch dit jaor haet de prinsekemmissie zien bes gedaon öm ‘ne gesjikte kandidaat te vinge.

Zoeëas geej allemaol in de belaevenisse heb kènne laeze, haet “De Nieje” d’r hartsjtikke vuuel zin in.
Weit geej weej ‘t geit waere, sjteur een mailtje nao Dit e-mailadres wordt beveiligd tegen spambots. JavaScript dient ingeschakeld te zijn om het te bekijken. of vul ‘t raoj breefke in
beej de Hamar, Juliana, Geloe of beej de Jumbo.

Geej maak ouch dit jaor wir kans op ein kedoo-bon, besjikbaar gesjteld door ein van ós sponsore
Top Slijterij Salut.

Raoj ’t nieje boerebroedspaar 2020

28-12-2019

Ouch dit jaor haet de boerekemmissie wir eur bes gedaon öm gesjikte kandidate te vinge.

Zoeëas geej allemaol in de belaevenisse heb kènne laeze, hebbe ‘t Nieje BB en eur getuge d’r
hartsjtikke vuuel zin in. Weit geej weej ‘t geit waere, sjteur een mailtje nao Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.
of vul ‘t raoj breefke in beej de Hamar, Juliana, Geloe of beej de Jumbo.

Geej maak ouch dit jaor wir kans op ein kedoo-bon, besjikbaar gesjteld door ein van ós sponsore
Top Slijterij Salut.

Belaeveniss JBB- Weej wille ouch wir efkes van ós laote hure

21-12-2019

Óngertösse zien weej alwir ’n paar maond verder. Achter de sjerme gebeurt d’r al vanalles.

De kleier zien inmiddels gepas en dao mós waal efkes get verangerd waere öm ’t good passend te kriege maar oeteindelik is dit gans good gekómme en is ’t toch waal wenne öm ós same te zeen in ’t sjpeegel met de kleier aan en kap en pet op ózze kop.

Same mèt ós elders zien weej in het geheim al ‘nne aovend beejein gewaes öm planne te make, tuurlik waas det ‘nne aovend mèt vanalles lekkers. Leuk is det öm same det groeëte geheim te meuge deile mèt elkaar want ’t deurt toch nag efkes vurdet ‘t 2-2-2020 is. De mix mèt al ós favoriete liedjes is al klaor en heej kènne weej veskes op sjpringe zoeëdet weej ouch genog conditie hebbe. Want ’t geit KNALLE!!!!

Op ‘nne duustere aovend zien weej foto’s gaon make. Óngerwaeges toch waal get kriebels in d’n boek.  Tjuu…nów veur ’t eggie in vol ornaad van sjoon wies kap en pet en alle accessoires d’r beej! Wat hebbe weej dao al ’n lol gehad. D’r zien hieël get foto’s gemak. Jaomer det weej uch nag niks meuge vertelle heej euver maar det got geej waal zeen op de posters, belhamelkrant en ós reseptiekaarte. Ouch weej zelf zien mega niejsierig nao ’t resultaat. Sjpannend!!!!!

Vastelaovend liek nag hieël wied weg. Gelökkig hebbe weej bienao de fieësdaag en dus ouch vakantie. As weej den waer nao sjoeël gaon, kènne weej beginne mèt aaftelle.

Weej winse idderein sjoeëne fieësdaag en ’n gezónk en gelökkig niejaor toe!
En det ’t gauw 2-2-2020 meug zien want weej hebbe d’r zin in. Geej ouch?

JBB 2020

Belaeveniss BB weej zien d'r klaor veur

14-12-2019

Weej kènne neet wachte!

Korte dage, lange nachte en frisse ochtende. De herfs verangerd langzaam in de winkter. Sinter
Merte is al langs gewaes, de piete kómme langs de deure en weej hebbe de vastelaovend al
ingesjaote. De joekskeppelle hebbe eur ieërste vastelaovesmeziek van ‘t seizoen al gejspeuld. En
geluif ós, den begint ‘t ech te kriebele. Dit is ‘nne vastelaovend dae veur ós, maar ouch veur ós
getuge, ontzettend biezónger geit waere. Want inmiddels weite weej wae ózze getuge waere.
Getuge die volmondig “jao” hebbe gezag!

Op ‘nne doordewaekse aovend tróffen weej elkaar op ‘n plek boete Belvend. Naodet de sjpanning
zorgvuldig woort opgebouwd, woorte weej aan elkaar onthult. Wat ‘n tof moment! En ein dink weite
weej zeker, dit zien de juuste minse öm same mèt ós de tent in Belvend op de kop te zette!

Same mèt eur zien weej inmiddels al mèt de keuzekemmissie beejein gekómme. ‘t Programma is
doorgenaome, de veurbereidinge zien in vólle geng en ouch ózze pekskes hebbe weej oetgezóch.
Veur ós meug ‘t eigelik waal beginne, maar weej mótte nag ‘nne hieële tied geduld hebbe.

Net as de prins zien ouch weej ontzettend niesjierig wae mèt ós die ker in Belvend geit trèkke. Wae
wuuert de Prins? Wae wuuer ‘t jeugboerebroedspaar? Welke hooghede kriege de KOW en de Jeug?
En hebbe zeej d’r net zoeëvuuel zin in as weej?

Weej haje ós nag efkes röstig en gaon gewoeën verder mèt ós normale laeventje. Maar sjtiekum telle
weej aaf richting ‘t klumpkesbal. Euver 2 en ein halve maond zette weej gans Belvend op de kop!

Gèkker mót ‘t neet waere!

Belaevenis van de nieje

15-11-2019

Sins ich mien lètste belaevenis in september heb gesjreve, is d’r alwir vuuel water door moder Maas gegaon. Ouch is d’r al vuuel wèrk verzatte. Inmiddels hebbe d’r al versjillende gesjprekke mèt de prinsekemmissie plaatsgevónge…… gelökkig zien det neet al te zjwaore vergaderinge en kènne weej d’r ouch good same eine drinke en ‘t den hebbe euver wat d’r geit kómme.

In miene kleierkas hingk inmiddels ‘n sjiek pak te wachte op 26 januari 2020. Ouch de mantel en de sjteek zien klaor vur gebroek. Dus van mich oet meug ’t gerös beginne…..VASTELAOVEND 2020.  

Maar ’t deurt nag zoeë lang…..ieërs kump Sinterklaos mèt zien zwarte piete nag efkes aan in Belvend. En ouch de körsdaag en aad op niej zulle weej zoeë hebbe. As dit allemaol èns achter de rök is….den kump ózze tied! 

Ich loos det ‘t nieje boerebroedspaar d’r ouch óntzettend vuuel zin in haet. Haopelik hebbe zeej ouch ‘n  moei getuge-sjtel gevónge wao zeej die daag mei daor gaon make. Ich bön zieër benied wae mèt mich die kèr gaon trèkke.

‘t Jeugboerebroedspaar haet ouch al van zich laote  hure….. stiekum zitte d’r toch al wat hoeëghede op heite kaole achter versjillende veurdeuren in ‘t dörp. Sjoeën hé. 

‘t Nieje vastelaovesseizoen is inmiddels al begós. As echte vastelaoves vierder heb ich d’r netuurlik eine geproos rónk de 11e van de 11e. Toch waal ‘n sjpeciaal geveul, nów de vastelaovestied wir aangebroke is. ’t Begint den ouch behuurlik te kriebele.  

‘t Moeilikste is missjien nag waal ‘t feit det ich ouch nag ‘n gans niej belhamelliedje oet de kop mót lieëre en det is neet zoeë hendig want dao zoemt al ‘nne gas maond : huur die bel`, huur die bel….. rónk. Maar good Belvend...alaaf mót ouch gaon lukke !!!

Wies ’t zoeë ver is, mótte weej ós nag efkes sjtil haje……………..

Belhamels 2020: GEKKER MÓT ’T NEET WAERE!

Ich zegk uch nag èns……. ’t geit nag gekker waere!

ALAAF.