Prins(es):
Inkele waeke geleje kreeg ich te huuere det ich 20 minute de tied had öm mich klaor te make ömdet weej nao dao jeug Belhamels móste. Ich zól ein van de hoofrolle hebbe.
Ich sjrok en kreeg metein sjpanning. Ich had gènne tied öm nao te dinke, aevel van bliesjap sting ich toch sjtiekum te juiche in mien kamer.
Op de geheime lokasie waas ich de allerieërste. Daona kwame d’r nag twieë. Ich zoot vol sjpanning, ich mós in ‘t midde gaon zitte en had toen al sjnel door wat vur rol ich had. Wie de wäörd woorte gezag: “Dich wuuers inderdaad de hoeëgheid” waas ich hieël blie. Sjtiekum kump miene druim nów oet. Nag sjieker is det ich det mèt twieë geweldige adjudante meug gaon doon en det weej ’t allerieërste Belhameljeugtrio gaon waere. Super sjiek! Ich heb nów al hieël vuuel zin in de vastelaovend.
Adjudant 1:
Ich had ‘nne chilldag wie mich woort gezag : “Dich hebs ein hoofrol beej de jeugbelhamels, weej mótte euver 2 eurkes örgens zien”. Die twieë oor zoot ich vol sjpanning te wachte. Wie weej eindelik aankwame op de geheime lokasie, zoot d’r al emus in de woeënkamer. Ich ging d’r langs zitte en d’r kwaam nag ‘nne derde persoeën binne. Weej zote in sjpanning aaf te wachte wae welke rol zól hebbe. Toen krege weej ’t te huuere. Ich was adjudant, adjudant wie gaaf is det!! Weej zulle ’t ieërste Belhameljeugtrio waere. Zelfs ’t ieërste trio van hieël Belvend. Ich had zoeëvuuel vraoge; wie zit ’t mèt dit , wie mèt det? Wannier kómme weej oet? Wat doon weej mèt de afterparty’s. Dit geit eine fantastische Vastelaovend waere. Ich heb d’r super vuuel zin in.
Adjudant 2:
Hieël niesjierig waas ich as mien elders al ein tillefoontje hadde óntvange. Neet dus. Aevel wie zeej op ‘nne zóndigmiddig vertelde det weej dae zelfde aovend op ein geheime lokasie woorte verwaach,kreeg ich toch waal de kriebels. Wat ein raar tiedsjtip! Wie weej binne kwame sjnapte ich d’r hieëlemaol niks van. Ich dach det weej mèt alle 7 rolle beej mekaar zólle kómme. Wao waas de res? Der zote d’r maar twieë. Wie Michelle ós vroog öm op ein sjpecifieke plek te gaon zitte, wis ich ‘t. Ich waer ein van de ieërste adjudante van Belvend.