Historie

  • ‘t Begós allemaol op 5 november 1953 tiedes ’n beejeinkóms van ’t Oranje-kómitee. Op die vergadering woort gespjraoke euver de oprichting van ’n carnavalsvereiniging binne Belvend. Door middel van ’n sjrieve woort aan z’n honderd inwoeëners ‘n oproop gedaon öm mei te wèrke. De organisatore lete d’r gèn graas euver greuje: Op 11 november aansjloetend woort de ieërste beejeinkóms belag, same mèt ‘t Oranje-kómitee en de toenmalige börgemeister Martin van Rijckevorsel. D’r kwame, jaowaal geej laes ’t good, nag 34 angere minse op aaf.

    Op dees aovend woort ouch al ein vurluipig besjteur gevormp. De heej nao geneumde persoeëne haje zitting:
    – Jan van de Voort (van de Mölder);
    – Harie Janssen (d’n Hollenger);
    – Fons Stevens (Maas);
    – Pierre Janssens (Kapper) en
    – Lex Geurts (van Kraane Kuëb)

    Jan van de Voort woort toet veurzitter gebombardeerd en dao-mei begós de vastelaovend te rolle. Of mèt de wäörd van de toenmalige sikkertaris Lex Geurts in ’t versjlaag van 1953/1953: ‘Dao ging ’t haer’

    ’t Ieërste bestjeur van de Belhamels.

    Van links nao rechs:
    – Fons Staeves (Maas)
    – Lex Geurts (kraane Kuëb)
    – Fons Staeves (Sjtool)
    – Jans van de Voort (van de Mölder)
    – Harie Janssen (d’n Hollenger)

    ’t  Vurluipige besjteur ging aan de sjlaag. Van Sjeng Schell (pannnemans) kwaam in ieërste instantie de naam “De Paerdsjterte” vur de kersverse vereiniging, die oet nege leje besjtóng. Aevel dae naam woort op de volgende beejeinkóms op 14 november al verangerd in “De Belhamels”.

    Dit op veursjtel van Lei Huys en Lex Geurts. En dae naam is ’t toet op vandaag gebleve.

    De ieërste raod van Elf met Vors Fons Staeves (Maas)

    ‘t Besjteur trók de sjtoute sjoon aan en begós aan de veurbereidinge vur ’t vastelaoves-seizoen 1953/’54. En sjtel uch veur eine richtige liedjesaovend vóng d’r plaats op 26 november, aevel neet naodet pesjtoeër dispensatie haaj verlieënd in verbank mèt de adventstied.

    In dreej daag tied woort d’r vanoet de rezidensie beej van Hooren aan de Maas ‘n raod van Elf gevormp.

    Tiedes de liedjesaovend op donderdag 26 november 1953 woorte d’r 11 vastelaovessjlaegers ingesjteurd, geej laes ’t good 11 sjtöks. Dae aovend woort d’r gesjiedenis gesjreve in ’t Belhamelriek. Sjeng Schell woort ieërste mèt de sjlaeger: ‘Sjeng doot dów de kinger maar nao bed’. De meziek is van Theo Langendonk. Eine sjlaeger mèt ‘ne lange aom, hae wuuert 40 jaor later nag gezónge en sjteit nów op de jubileum-CD van de Belhamels.

    Laeze weej de notule van dae vastelaovend van 1954, den zeen weej det ‘t besjteur besjtóng oet de hieëre: Fons Stevens Hzn (Sjtool) Hzn sjteit vur zoon van Handrie, veurzitter; Lex Geurt, sikkertaris; Fons Stevens (Maas) vice-veurzitter; Harie Janssens en Jan van de Voort as joeksveurzitter. Verder nag kemmissies vur techniek, pers en propaganda, joeks en financiële.

    D’r ware in det seizoen al versjillende fieëstelikheje zoeëwie ‘ne liedjesaovend, ‘ne bonkte aovend en netuurlik ’t Prinsebal. En ouch ’n vastelaoveskrentje. D’n ieërste Prins waas Jos d’n I (Martens) baeter bekend as Jos van de Pos. ’t Hek waas van d’n dam oftewaal ‘t ieërste sjaop waas d’r euver haer. In de jaore 1958, 1959 en 1963 waas d’r gèn officiële vastelaovesviering in Belvend. Door versjillende ömsjtandigheje waas de vereiniging toen neet aktief. D’r waas gènne Prins en gèn oetgave van de sjtaatskrant “d’n Belhamel”. Ömdet de vastelaovesviering pas in 1964 op geng kwaam waas d’r in det jaor ouch gèn krant.

    Volges ’t waordebook Koenen oet dae tied, beteikent ‘Belhamel’;  Een hamel met kling of bel die aan het hoofd van de kudde gaat. (Een hamel is een besneden ram).

    Bron: Jubileumbook c.v. De Belhamels 1953-1997

    De Prinse, Broedspare en Jeugbroedspare die we door de jaore haer hebbe gehad hebbe zich vereinig as de Aad Prinse, Aad Broedspare en Aad Jeugbroedspare.

    Aad Prinse

    De Aad Prinse Club is opgerich in 1975. De aanzet woort gegaeve door Jan Naus en Neer van Dijk (Aad-Prinse van ‘t ieërste oor), tiedes eine “sjtille” vastelaovesmaondig in zaal ‘t Witte Paerd beej Rang Beurskens. Terwieël zeej mèt doorsjlaeg, deksels en panne same mèt nag angere vastelaovesvierders door de zaal trokke, kwaam de gedachte det d’r ouch op vastelaovesmaondig get mieër kebaal mós kómme in ‘t Belhamelriek.

    De Aad Prinse zien ouch op Facebook te vinge ónger: Aad Belhamel Prinsen

    Aad Broedspare

    D’r is eine tied van kómme en van gaon, ouch veur ein broedspaar. Op ‘t Sjpruutjesmatinee, net vurdet ‘t nieje paar bekènd wuuert gemak zal ‘t broedspaar aafsjied nimme en verder gaon as Erme Tak binne ‘t gezelsjap. Dees aafsjloetende sirremonie is hieëlemaol in heng van ‘t Traum Team. Zoeë nump zich de klup van Aad Broedspare die ‘t aaftraejende paar op ludieke wieze in eur midde opnimme. Door de sjtaldeure geit ‘t paar mèt de getuge den truuk in de anonimiteit. Aad Broedspare binne ‘t gezelsjap zien te herkènne aan de sjpeld met de twieë klómpe en eur boere jaortal dao beej ingegraveerd.’t Traum Team hèlt meisjtal op de ieërste zaoterdig in juli eur jaorliks oetsjtepke. Tradisie is inmiddels de picknikmang mèt al det lekkers van ‘t boerelangk en oet de sjtal. Die mang geit altied mei mèt de fiets en op ein sjoeën plekske vingk den de picknik plaats. Verder is ‘t jaorliks ein verrassing wat de organisasie wir oet d’n aek haet gedreid. Ein versjlaag van de daag mèt foto sjteit ‘t jaor d’r op in de Belhamelkrant.

    Aad Jeugbroedspare

    Ouch de Aad Jeugbroedspare hebbe zich metein gevónge. Zeej gaon veskes same op resepsie beej ‘t nieje Jeugbroedspaar.

Home » Vereiniging » Historie