Carnavalsvereiniging

De Belhamels

Belaevenisse

Prins

Letste belaevenis

15-01-2020

Wie ich mich veul……

Leef minse, kènt geej de volgende teks ;

Pas in ’t nieje jaor leet mien gelök verbórge
In de tössetied vervael ich mich kepot
Bin mich de ganse daag aan ’t verheuge
Op det eine groeëte moment
Det weej eindelik wir meuge
Nao de kroeg, ’t plein en op de kop die tent
Ich kèn neet mieër wachte wachte wachte wies dae vastelaovend
Wachte wachte wachte en dan iddere aovend
Trèkke weej ‘m door
Wies ’t allerletste oor
Ich kèn neet mieër wachte
Ich wach nów al ’n jaor 

Det is precies wie ich mich veul!

 Nag efkes en den geit ‘t gebeure…..den sjtaon ich dao oppe bühn in de Hamar as prins van de Belhamels. Sins de 11evan de 11e is ‘t allein maar sjpannender gewaore. De fieësdaag vloge vurbeej en euver 11 daag geit ‘t eindelik gebeure. Ich kèn neet mieër wachte en heb d’r den ouch ontzettend vuuel zin in. ’t Blief nag efkes sjpannend……dus nag ‘n bietje geduld vurdet ich mich zelf aan uch bekend meug make. Weej zeen ós de 26ste !

De vastelaovendsker sjteit al klaor….. bön beniejd mèt welke angere hoeëghede ich dees kèr meug goaon trèkke. Ich bön d’r klaor veur…….en ich haop det geej det ouch ziet. 

Belhamels 2020: GEKKER MÓT ’T NEET WAERE!
Ich zèg uch nag ens……. ’t geit nag gekker waere!

ALAAF

Belaevenis van de nieje

15-11-2019

Sins ich mien lètste belaevenis in september heb gesjreve, is d’r alwir vuuel water door moder Maas gegaon. Ouch is d’r al vuuel wèrk verzatte. Inmiddels hebbe d’r al versjillende gesjprekke mèt de prinsekemmissie plaatsgevónge…… gelökkig zien det neet al te zjwaore vergaderinge en kènne weej d’r ouch good same eine drinke en ‘t den hebbe euver wat d’r geit kómme.

In miene kleierkas hingk inmiddels ‘n sjiek pak te wachte op 26 januari 2020. Ouch de mantel en de sjteek zien klaor vur gebroek. Dus van mich oet meug ’t gerös beginne…..VASTELAOVEND 2020.  

Maar ’t deurt nag zoeë lang…..ieërs kump Sinterklaos mèt zien zwarte piete nag efkes aan in Belvend. En ouch de körsdaag en aad op niej zulle weej zoeë hebbe. As dit allemaol èns achter de rök is….den kump ózze tied! 

Ich loos det ‘t nieje boerebroedspaar d’r ouch óntzettend vuuel zin in haet. Haopelik hebbe zeej ouch ‘n  moei getuge-sjtel gevónge wao zeej die daag mei daor gaon make. Ich bön zieër benied wae mèt mich die kèr gaon trèkke.

‘t Jeugboerebroedspaar haet ouch al van zich laote  hure….. stiekum zitte d’r toch al wat hoeëghede op heite kaole achter versjillende veurdeuren in ‘t dörp. Sjoeën hé. 

‘t Nieje vastelaovesseizoen is inmiddels al begós. As echte vastelaoves vierder heb ich d’r netuurlik eine geproos rónk de 11e van de 11e. Toch waal ‘n sjpeciaal geveul, nów de vastelaovestied wir aangebroke is. ’t Begint den ouch behuurlik te kriebele.  

‘t Moeilikste is missjien nag waal ‘t feit det ich ouch nag ‘n gans niej belhamelliedje oet de kop mót lieëre en det is neet zoeë hendig want dao zoemt al ‘nne gas maond : huur die bel`, huur die bel….. rónk. Maar good Belvend...alaaf mót ouch gaon lukke !!!

Wies ’t zoeë ver is, mótte weej ós nag efkes sjtil haje……………..

Belhamels 2020: GEKKER MÓT ’T NEET WAERE!

Ich zegk uch nag èns……. ’t geit nag gekker waere!

ALAAF.

Belaevenisse Prins 2020

27-09-2019

Van de groeëte sjrik bekómme,


Ós zomervakansie waas alwir bienao vergaete, toen ich örges op ‘n locatie ‘nne waal hieël bekende
man taege kwaam. Dae had ich dao ech neet verwach. Dees man veel den ouch direk mèt de deur in
hoes en vroog mich of ich op 26 januari 2020 zin had öm same mèt de Belhamels ein fieësje te viere.
De vors, de Belhamels, fieësje viere, 26 januari 2020……ich kós ‘t neet gluive….waas dit ech waor en
gènne druim? Einmaol van de groeëte sjrik bekómme……zei ich uiteraard volmondig JAO. Dao heufde
weej neet lang euver nao te dinke.

Toen weej thoes kwame ware weej nag hielemaol beduus. Dao ging òs vanalles door de kop. Hoe dit,
hoe det…. en wat as……zoeë vuuel dinge wao weej nag gèn antwoord op hadde op det moment.
Weej hebbe den ouch dae nach same gèn oug toe gedaon.

De ieërste kennismaking mèt de kemmissie haet inmiddels plaatsgevónge……heej krege weej
dudelikheid wat ós te wachte sjteit. D’r mót óngertösse vuuel gebeure, maar det doon weej mèt
vuuel plezeer.

De lange tied van sjtil haje, zjwiege en dich neet verpraote is begós. En ‘t deurt nag zoeë lang wies
det ‘t eindelik zoeë ver is. Mèt welke kèrtrekkers gaon ich det doon? Erg sjpannend allemaol.

Ein dink is zeker, ich heb d’r hieël vuuel zin in.

‘t Mótto 2020 van de Belhamels is : ‘t mót neet gekker waere!

Ich zeg uch…….’t geit nag gekker waere!