Carnavalsvereiniging

De Belhamels

Belaevenisse

Boerebroedspaar

Belaeve 't raoje is begos

21-01-2020

Belvend is aan ‘t raoje!

Belvend is aan ‘t raoje!Weej zien ós zelf al ‘n paar kieër taege ’t lief geloupe. Ós raojfoto hangk al efkes op versjillende plekke in ‘t dörp. En ouch online hebbe weej ós raojfoto al ‘n paar kieër vurbeej zeen kómme. Idderein vruug zich aaf wae ’t toch zól zien. Versjillende name waere geneump en breefkes waere al druk ingevuld. Zulle weej al vaak geneump zien?

D’r wuuert sjteeds mieër euver de vastelaovend gespraoke. Planne waere gemak en de veurbereidinge waere getróffe. Idderein haolt de pekskes langzaamaan van de zölder. ‘t Begint ech te laeve! De vastelaoevend kump sjteeds doender beej! 

En wie mieër d’r euver de vastelaovend gespraoke wuuert, wie mieër ‘t begint te kriebele. ‘t Haajt ós sjteeds mieër bezig. ‘nne Lange tied leek ‘t  nag allemaol hieël ver weg, maar nów beginne weej toch langzaamaan óntzettend zenuwachtig te waere. 

In jspanning wachte weej  aaf welke prins en jeugdprins(es) d’r volgende waek waere geprizzenteerd. Weej zien óntzettend niesjierig mèt wae weej ’t fieësje meuge make.En euver twieë waeke geit ‘t gans los. Op 2 fibberwarie gaon weej óndekke wae  het jeugboerebroedspaar is. En vervolges meuge weej ós, same mèt ós getuge, aan gans Belvend bekend make. 

Tot dae tied haje weej ós nag efkes sjtil. Weej  luustere wat vastelaovesmeziek, probere get rös te pakke en bereide ós verder veur. Den kènne weej vanaaf 2 fibberwarie ouch ech duchtig gaas gaeve!

Weej haope uch te zeen op het sjpruutjesmatinee! Wies jsnel!

‘t Boerebroedspaar en getuge 2020

Belaeveniss BB weej zien d'r klaor veur

14-12-2019

Weej kènne neet wachte!

Korte dage, lange nachte en frisse ochtende. De herfs verangerd langzaam in de winkter. Sinter
Merte is al langs gewaes, de piete kómme langs de deure en weej hebbe de vastelaovend al
ingesjaote. De joekskeppelle hebbe eur ieërste vastelaovesmeziek van ‘t seizoen al gejspeuld. En
geluif ós, den begint ‘t ech te kriebele. Dit is ‘nne vastelaovend dae veur ós, maar ouch veur ós
getuge, ontzettend biezónger geit waere. Want inmiddels weite weej wae ózze getuge waere.
Getuge die volmondig “jao” hebbe gezag!

Op ‘nne doordewaekse aovend tróffen weej elkaar op ‘n plek boete Belvend. Naodet de sjpanning
zorgvuldig woort opgebouwd, woorte weej aan elkaar onthult. Wat ‘n tof moment! En ein dink weite
weej zeker, dit zien de juuste minse öm same mèt ós de tent in Belvend op de kop te zette!

Same mèt eur zien weej inmiddels al mèt de keuzekemmissie beejein gekómme. ‘t Programma is
doorgenaome, de veurbereidinge zien in vólle geng en ouch ózze pekskes hebbe weej oetgezóch.
Veur ós meug ‘t eigelik waal beginne, maar weej mótte nag ‘nne hieële tied geduld hebbe.

Net as de prins zien ouch weej ontzettend niesjierig wae mèt ós die ker in Belvend geit trèkke. Wae
wuuert de Prins? Wae wuuer ‘t jeugboerebroedspaar? Welke hooghede kriege de KOW en de Jeug?
En hebbe zeej d’r net zoeëvuuel zin in as weej?

Weej haje ós nag efkes röstig en gaon gewoeën verder mèt ós normale laeventje. Maar sjtiekum telle
weej aaf richting ‘t klumpkesbal. Euver 2 en ein halve maond zette weej gans Belvend op de kop!

Gèkker mót ‘t neet waere!

Belaevenisse Boerebroedspaar 2020

07-10-2019

‘T waas ‘nne doeëdgewoeëne door de waekse daag. Dao sjtóng ‘saoves laat inèns emes vur de deur. Totaal ónverwach. Of zeej efkes binne moch kómme.  Tuurlik, waorum neet? Maar wae bis dich? Maar det woort sjnel dudelik.
Weej Boerebroedspaar 2020? Gekker mót ’t neet waere!!!

Dao zote weej al vlot mèt de mónk vol teng. Of weej Boerebroedspaar 2020 wille waere? Weej ware óntzettend verras en hadde uiteraard óntzettend vuuel vraoge, maar baovenal vónge weej ‘t ein óntzettende ieër det zeej aan ós dóchte öm dees prachtige rol te meuge vervulle. “Laot ‘t maar èns efkes bezinke en laot den maar get weite” en dao ging zeej wir.

 De hoesmeister waas klamp weg, of weej kwame al sjnel toet dezelfde conclusie. Dit is ein unieke kans die weej ech neet aan ós vurbeej meuge laote gaon.

Weej gaon ‘t doon!

 Eine sjlaopeloze nach volgde. Vanalles ging door de kop. Wat kump d’r allemaol op ós aaf? Wie gaon de veurbereidinge? En veural, wae gaon weej allemaol veurdrage as ós getuge?

 Óngertösse hebbe weej same gezaete mèt de keuzekemissie en ‘nne houp is ós nów waal dudelik gewaore. Weej hebbe d’r óntzettend vuuel zin in!

 Örges veult de vastelaovend nag wiet weg, maar vur se ‘t wets sjtaon weej dao op de bühne in de Hamar. Ech waor… Gekker mót ’t neet waere!