Carnavalsvereiniging

De Belhamels

Leef vastelaovesvriende

‘t Is nów begin juli, ‘t einde is inzich. Bienao idderein dae det wil haet inmiddels tenminste eine prik in de baoveérm gehad. De ieërste versoepelinge zien wir meugelik. Gèn mónkképkes mieër, wir mèt get mieër luuj beej elkaar, lekker örges ein hépke aete. Dinge die zoeë normaal ware, desse nów toch wir bliej bös det ‘t allemaol wir op géng kump. Misjien neet ech ‘t moment óm aan de vastelaovend te dinke. Toch hebbe weej ein belangrieke meidedeiling te doon.

Binne de Belhamelfemilie sjpeult de Vors eine zieër belangrieke rol. Hae is verantwoordelik vur ‘t ganse reile en zeile binne de raod en zörg d’r same mèt zien raodsleje veur det ‘t de hoeëgheid aan niks ontbrik. Ein rol die ózze huidige vors, John van Wylick mèt verve vervult. Nao 4 hoeëghede begeleid te hebbe, haet John beej ós aangegaeve det ‘t kómmende seizoen zien letste seizoen as vors van de Belhamels wuuert maar det hae d’r same mèt alle Belhamels nag ein geweldig vastelaovesseizoen van geit make, vurdet hae de vaere euvergeuf aan zien opvolger.

De aafgeloupe maonde zien weej mèt dit gegaeve aan de sjlaag gegaon en weej zien trots uch te kènne meideile dét weej eine waerdige opvolger as vors van de Belhamels hebbe gevónge in de persoeën van Geert Kurstjens. Geert is uiteraard gènne onbekende van de Belhamels. In 2013 is hae ózze veurgenger gewaes as hoeëgheid Prins Geert VI. Geert veult zich same mèt zien vruike Vivian zieër verieërt öm dees rol te vervulle. Names ‘t besjteur wins ich Geert kómmend jaor nag eine röstige vastelaovend toe, want nao dit jaor meug heej pas ech gaon knalle mèt vastelaovend.

As ‘t moment dao is, zólle weej uch verder informere euver de wies wie de euverdrach geit plaatsvinge.

Ron van Zoest, veurzitter c.v. De Belhamels.

geert