Carnavalsvereiniging

De Belhamels

Beeldend kunstenaar Ruud Simons oet Blerick haet vur de kómmende vastelaovend D’n Opstaekerᵀᵐ 2020 óntworpe. Vors Carotius VIII van Vastelaovesgezelschap De Wortelepin vraog Simons öm dit jaor oet naam van alle vief de sjtadsdelvereniginge D’n Opstaekerᵀᵐ 2020 te óntwerpe. Het óntwerp van Simons is een ode aan de kater. 

Opstaeker

Mèt Vastelaovend tovere weej altied wir de meiste fantasievolle creaties ónger ózze muts oet. De gekste ideeën ontsjtaon, de creativiteit vluug oet ózze kóp en vingk zien vorm in allerlei pekskes, gesjminkte snoetjes, hudjes en optochwaeges. De tied van joeks en theater is aangebraoke wao beej ‘t vloeibare goud ouch riekelik door de sjtraote sjtruimp, zoeë zaet Simons. Maar zoeëas alles in ‘t leave haet ouch de vastelaovend soms zien klein naodeil.

Mèt al det gefieës kèn ‘t zien desse sangerdaags opsjteis mèt eine versjrikkelikke koppien. De alcohol luuet den zien valse karakter zeen. Beej meinige vastelaovesvierder is den ein paracetamol, eine flink sjlók koffie en ein geruusterd boterhammeke nuuedig öm zich smiddigs wir vol euvertuuging euver te kènne gaeve aan de meziek en ‘t gedans. En opèns huuers se den wir: “Sjöd d’r mich nag eine in, ich ving det grej zoeë lekker….”

Ruud simons (57) haet in Mestreech de sjtadsacademie vur Toegepaste Kunst (ABKM) bezóch en de ieërste graod docente opleiding TEHATEX wao hae in 1986 is aafgesjtudeerd. Mieër informatie euver Ruud Simons is te vinge op www.ruudsimons.com

D’n Opstaekerᵀᵐ’ is ein soort broche die sjteit vur een dreejtal zake; eine bliek van waardering vur de vuuele vreejwilligers die allerlei carnavalsactiviteite organisere in de sjtadsdeile Venlo, Bliërick, Tegele, Belvend en Árce en Velden; ein bliek van betrokkeheid beej de vastelaovend en eine finansjele opstaeker vur alle carnavalsvereniginge in deze regio. De vief sjtadsdeilvereiniginge van de gemeinte Venlo haope det de inwoeëners, net as verleje jaor, wir massaal dees vastelaovesbroche zólle koupe öm zoeë de versjillende vastelaovesactiviteite van de diverse vereiniginge te óngersjteune.

D’n Opstaeker™ 2020 zal op d’n Ellefde van d’n Ellefde waere geprizzenteerd. Vanaaf dae datum is hae ouch te koup beej Marskramer, Topslijter Salut, Café-Zaal ‘Juliana’, en tiedes de versjillende carnavalsaktiviteite.