Leef Belhamels en Belhamelinnekes,
Ós laeve wuuert nag sjteeds beïnvloed door ’t Coronavirus en alle regels daoröm haer. ‘t Kèn den ouch neet oetblieve det dit gevolge haet vur ’t vastelaovesseizoen 2020-2021.
Vastelaovend is ein fieës det besjteit oet gezelligheid, saamhuuerigheid, verbroedering en belaeving. Weej pakke elkaar beej de hank en sjlaon eine erm öm elkaar haer. Zelfs mèt in achnimming van alle regelgaeving rónköm Corona en alle te trèffe maotregele waobeej gezónkheid vur idderein op de 1ste plek sjteit, liek ’t vreejwaal ónmeugelik öm ein fieës as vastelaovend in gooj orde en zónger risico’s te laote verloupe.
De Belhamels hebbe zich samen mèt jeugdcarnaval (JCB) en het KOW ingesjpanne öm alternatieve te bedinke. Weej hebbe ós aafgevraog of weej binne de veilige Coronamaatregelen vur hoeëghede en leje en alle angere vastelaovesvierders genóg belaevig kènne creëre. Of weej ein programma kènne make det ’t vastelaovesgeveul van saamhuuerigheid en gezelligheid beejd. Jaomer genóg haet ’t besjteur van c.v. De Belhamels, mèt pien in eur vastelaoveshert, ein moeilik besjloet mótte nimme:
De Belhamels zulle vur ‘t seizoen 2020/2021 gèn vastelaovesactiviteite organisere.
Weej beseffe hieël good det dit besjloet eine groeëte impact haet op ’t “cultureel” laeve binne Belvend.Juus in dees tied kèn de Vastelaovend vur ein sjtökske verlichting zörge. Aevel ’t virus nag sjteeds aanwezig is en d’r nag gèn vaccin is, is ’t ónverantwaord öm op 1,5 maeter, zónger gezónkheidsrisico’s ein sjpontaan fieës te organisere waomei rech kèn waere aangedaon aan alles waoveur Vastelaovend sjteit.
‘t Seizoen 2020-2021 zal in zien gehieël waere doorgesjóve nao ‘t seizoen 2021-2022.Prins Roland I, boerebroedspaar Mikel en Sanne en eur getuge Roy en Ankie blieve aan as hoeëghede, zoeëdet zeej in ’t volgend seizoen op ein waardige wieze kènne aafsjloete.Weej haope den ouch det weej rónk de zomer van 2021 wir de veurbereidinge vur ein niej seizoen kènne oppakke en det weej wir activiteite kènne gaon organisere.
In good euverleg gaon ós partners in de Belvendse vastelaovend, JCB en KOW, mèt ós mei in ’t genaome besjloet en zulle zeej ouch gèn hoeëghede oetrope of vastelaoves activiteite organisere.
C.v. De Belhamels betreurt ’t netuurlik det weej baovesjtaond besjloet hebbe mótte nimme. Binne de gesjiedenis van de Belvendse vastelaovend haet dit zich nag noets ieërder veurgedaon. ‘t Veult den ouch vraemp, vervaelend en lastig öm dit besjloet te mótte nimme, aevel de gezónkheid van alle vastelaovesvierders in Belvend waege zjwaorder den ’t neet door laote gaon van ein sjoeën Vastelaoves traditie.
Heb geej nag vraoge? Nim den gerös contact op via ós sikkertariaat ónger:secretariaat@belhamels.nl
Met vrintelikke groete,
Namens het bestuur
c.v. De Belhamels
Ron van Zoest, veurzitter
Mèt vastelaovesblood kump ’t gans good